søndag 22. desember 2013

Fjerde søndag i advent

Kjære venner, store og små,
nå er det fire tusen tre hundre og sekstisju smultringer å få.
Gratis!

God adventssøndag, vakre menneske! Håper de får ei nydeleg jul med god mat, mange klemmar og fine stunder. I år skal bømlingen min og eg feire jul med familien min og det gler eg meg veldig til.

Kjærleik til dykk alle!

fredag 13. desember 2013

Eg hugsar snøen

Eg hugsar snøen. Korleis han gjorde alt kvitt og reint og stille, og korleis du såg ut klokka fire om natta, eller kanskje det var morgon, då du var ute på plenen i pyjamas og støvlar for å lage ein snømann som skulle ynskje meg god dag på veg til jobb.

Eg hugsar skrivebordet. Det tjukke, tunge skrivebordet av massivt tre som fekk alt du gjorde til å verke så viktig, som om du planla å kurere kreft, skape fred på jord og få slutt på fattigdom og svelt i løpet av same ettermiddag. Lite visste eg kva du eigentleg jobba med.

Sollyset var så vakkert der inne, det leika på golvet og på veggane, kitla bøkene i bokhyllene me snekra i lag og gav deg ein glede det elles var vanskeleg å finne. Eg saknar den du var i det rommet.

Eg hugsar den dagen mest av alt. Eg hugsar kvar einaste detalj, som kva leiketøy ungane hadde lagt i frå seg i trappa. Eg snubla og var nær ved å falle med hovudet fyrst på grunn av den brannbilen me kjøpte i lag på Hamleys i London då eg gjekk rundt med den store, gravide magen min og insisterte på å besøke alle sju etasjane for å finne den perfekte gåva til han som levde inni meg som me gleda oss så inderleg mykje til å møte. Og av alle ting enda me opp med ein brannbil som han ikkje kunne leike med på fleire år, men det kjendest så rett i augeblikket.

Me drog tilbake då eg var gravid med Tilla og kjøpte Sirius Black sin tryllestav til henne. Då ho såg deg på sjukehuset prøvde ho å trylle deg tilbake til oss.

Eg hugsar nesten alt du har sagt til meg, sjølv etter alle desse åra. Eg hugsar t-skjortene dine og dressjakka di som du fann i den litle butikken i ei sidegate i Berlin som gjorde skuldrene dine ekstra breie og sterke. Eg hugsar kor mange kaffikoppar du drakk til dagen, kva munnen din smakte og kor glad du var i å danse med meg - sjølv når det ikkje vart spelt musikk - men uansett kor mykje eg prøver, så klarer eg ikkje å hugse stemmen din. Alt eg vil er å høyre deg seie at du elskar meg.

søndag 1. desember 2013

Stort sett er konklusjonen den same

Han står framme på scenen, introduserer kvinna ved sida av han og seier "Dette er kjærasten min. Me har ikkje møtt kvarandre enno."

Hjartet mitt knuser og vert heilt igjen i neste augeblikk og eg veit eg vil skrive, men får det ikkje til, så eg skriv handlelister, notat, prøver på ein tekst eg ikkje vert nøgd med, vurderer om han er verdt å poste, utset det, lagar ein julekalender til kjærasten med 24 ting eg elskar ved han (pluss bonusrute). Saknar han med ein gong han har dratt og tel ned dagane til han kjem tilbake. Elskar han så mykje at eg byrjar å gråte. Græt nesten på generalforsamling. Græt av filmen eg ser før det er leggjetid, men vert oppgitt over at filmskaparen er allergisk mot stille. Stille er eit av dei beste verkemidla som finst. Stille er viktig.

Eg veit ikkje kva livet mitt kjem til å føre med seg, eg har ingenting konkret å svare når folk spør meg kva eg vil gjere etter eg er ferdig med masteren min og eg får små samanbrot når alt har bygd seg opp over for lang tid og eg har tid til å tenkje på det, men stort sett er konklusjonen den same:

Eg er god på å elske, og han eg elskar høgast av alt elskar meg tilbake og gir meg den støtta eg treng til å halde fram med masterarbeid og møte nye dagar. Me møtte kvarandre i Haugesund ein kald torsdagskveld i mars i fjor og så lenge framtida mi har han i seg, så kjem alt det andre til å gå bra.

torsdag 21. november 2013

24 år og 1 dag

I dag er eg 24 år og ein dag og sidan sist bursdag har eg:

- kyssa kjærasten min hundrevis av gonger


- gått fleire mil
















- sykla fleire mil

- feira nyttår i Bergen

- møtt nye menneske


- vore i Bremen


- vore i København


- møtt og gitt klemmar til Amanda Palmer to gonger




- grilla veganske pølser på ein eingongsgrill i Røyken i Buskerud

- sunge fleire songar

- skrive fleire tekstar (men ikkje så mange som eg skulle ynskje)

- byrja på masteroppgåva mi


- hatt munnleg framføring om off-off-Broadway og Fluxus i New York

- gråte fleire tårer, nokre av glede

- ledd mykje

- smilt til fleire framande

- snakka engelsk

- snakka tysk

- snakka tulledansk

- tatt fleire bilete














- ete god mat








- gitt fleire gåver

- fått fleire gåver


- skrive fleire brev


- lese fleire bøker (men ikkje så mange som eg skulle ynskje)

- gråte på kino

- ledd på kino

- sett fleire teaterframsyningar

- hjelpt til med å skape ei teaterframsyning




- sovna og vakna ved sida av han som tyder mest for meg i heile verda